Note- “Thakur Sahab” dusre bhaag ko padhne se pehle “Thakur sahab” ke Pehle bhaag ko padhe.

Abhi tak aapne pehle bhaag mein padha ki Amit ko Thakur sahab ki naukari mil jati hai. Naukari kerne ke dauran Amit ek raat vapas apne ghar jaate waqt kuchh logon ki batein sunker sochne ko majhbur ho jata hai. Ab aage:

Mujhe abhi vaapas haweli jaker Thakur sahab ko bataana hoga ki unki jaan khatare mein hai. Isi udhed-bun ke saath Amit vapas haweli pahunch jata hai. Jaise hi Thakur sahab ke kamare mein Amit jata hai, jate ke saath hi pairo tale jamin ghisak jati hai ..Ye kya? Thakur sahab khoon se lathpath pade the, daudker Amit unhe aspatal le jaane ke liye apne kandhe per laadker haweli ke baahar nikalte hi ekaek kadam thithak pade – Samane Brijesh ke saath-saath pura gaav chilla raha tha.

“Pakado….pakado..dekho Amit babu ko Thakur sahab ki hatya kerke laash ko thikaane lagaane le ja raha hai” – Pura gaav ek saath bol pada.

Bahati ganga mein haath dhoye bina Brijesh bhi kaha pichhe rahanewala tha. “Saale ne apni jaat dikhaa hi di. Kitni baar mana kiya tha ki itna paraaye pe bharosa mat karo. Per maante hi kaha the-” Brijesh ne gaavwalo ko aur uksaate huye.

“Chhote Thakur.. aap thik kahate hai.” – bheed mein se kuchh logo ki aawaz aai.

Kahate bhi kyu nahi, unka vishwaas jo toota tha. Kaha jaata hai n – “Aankho dekhi baat bhi kabhi-kabhi galat ho jaati hai.” – Vahi stithi aaj gaavwalo ke saath thi.

Logon se Amit minnat ker rha tha ki “Maine Thakur Saheb ko nhi mara. Mai toh inhe ispatal le ja rha tha taki inki saanse thodi bahut bhi chal rhi ho toh yeh bach sake.” – Amit chikh-chikh ker apni baat kahe ja rha tha per uski aawaz itne logon ki awaaz dab ker reh gyi.

“Isko koi chhodna mat.” -kehte huye bheed Amit ki taraf badhane lagi.

Itne mein hi- “Hato…Hato..Sabhi Hato” –Kehte huye police jeep mein baitha leti hai. Amit jeep mein toh baith jata hai kintu kai anbhujh sawal uske samne aa khade hote hain jiska jawab abhi tak nhi mila tha. Vo yeh ki –

1. Vo log kon the jo jhadiyo ke paas the?
2. Kisne Thakur sahab ki hatya ki?
3. Jaha per amine aawaaz suni waha se haweli chhote se chhote raste se bhi aane per takriban aadha ghanta lagta hai. Aese mein mere pahuchane se pehle vo log Thakur sahab ki hatya kaise ker sakte hain?
4. Raat mein toh Thakur sahab ke saath Thakurain hoti hai, aese mein un logon ne Thakur sahab ki hatya ki toh Thakurain ko kyun chhod dya.
5. Aakhirkaar Thakurain hatyare ko dekhi hogi toh unhone gaav walo ke samne uska naam kyu nhi liya?
6. Mai nirdosh hote hue bhi mujhe kyu fasaya gya?

Aaj itne saare sawalon mein se ek ka bhi jawaab Amit ke paas n tha. Vo samajh chuka tha ki mujhe bahut buri tarah se fasaya gya hai? Ab mujhe bhagwan hi bacha sakta hai. Yahi sochte hue chup-chap kaal Kothari mein baithne ke siwa ab uske paas koi chaaara bhi n tha.

Amit apne us din ko kos rha tha jis din Thakur sahab se mulakat hui thi. Inhi soch v sawalo ke bich Amit ulajh ker reh gya. Kab raat se din v din se raat beet jaata pta hi nhi chalta. Dheere-Dheere apne azaad hone ki aasha chhutati ja rhi thi kyoki adaalat mein bhi sare sabut Amit ke khilaaf the isliye Amit ko kisi se n umeed thi n Aasha. Uska tha bhi kaun? Le-de ker ek patni—Vo bhi unpadh. Amit acchhi tarah se samajh chuka tha ki ab sari zindagi isi kaal Kothari mein bitani padegi kyoki aaj uski aakhri sunwayi hai. Yahi sochte-sochte Amit dono ghutno ke beech sar rakhker phut-phut ker rone laga.

Khat…Khat “Chalo Adaalat ka samay ho gya.” – Ek policewale ne kaha.

“Huu..” – Thake kadmo se Amit lockup se bahar nikalte hue.

Adaalat mein

“Order—order.. Aage ki karyawahi shuru ki jaye.” Judge ne hathoda table per maarte hue.

Sare sabut Amit ke khilaf hone ke karan judge apna aakhiri faisla sunane ja hi rhe the ki – “Judge Sahab… Rukiye… Yeh nirdosh hai.” – Thakurain ne apna aapa khote hue.

“Aapko jo bhi kehna ya bolna hai iss katghare mein aaker bole.” – Judge ne katghare ki taraf ishara kerte hue.

“Mai jo bhi kahungi sach kahungi aur sach ke siva kuchh nhi kahungi.” – Geeta per hath rakhker Thakurain kasam khati hai. “Judge sahab… Yeh nirdosh hai… Iski doshi mai hu… Isko chhod dijiye.” – Thakurain kehte hue phut-phut ker rone lagi.

“Adaalat ka vakt n jaya kerte hue aap thik se batye” – Judge ne Thakurain se kaha.

“Judge sahab… baat us raat ki hai jab mai aur Thakur sahab kamare mein sone ja hi rhe the ki mujhe yaad aaya ki dud ka glass toh rasoighar mein hi chhut gya. Usi glass ko lene ke liye mai rasoighar mein gait hi ki shor-sharaba hone laga. Aesa lag rha tha jaise kai log ghus ker kisi se hathapaai ker rhe ho.. Mai usi taraf bhaagi jis taraf ka short ha. Dekhti kya hun? Kuchh log Thakur sahab ko maar ker khidki se kud rhe the. Saiyog tha unmein se ek hatyare ko kudte vyakt peeth per lohe ki grill se gaheri chot aa gyi. Itne mein hi Amit gate se aata dikhai diya. Mai soch mein pad gyi… Amit.. Iss samay… Haweli mein… Mujhe laga ho n ho Amit ka hi isme hath hai.” – Thakurain kehte-kehte ruk gyi.

“Aakhir mein aap kehna kya chahti hain.” – Judge ne kaha.

“Thakur Sahab ka hatyara koi aur nhi judge sahab.. Unka beta Brijesh Thakur hai.” – Thakurain Brijesh ki taraf ishara kerte hue. Poore Adaalat mein kaana-phusi shuru ho gyi.

“Order..order. Yeh aap kaise keh sakti hain?” – Judge ne puchha.

“Judge sahab… chaar din pehle ki baat hai. Brijesh akhade mein ganji pahan ker kushti lad rha tha. Mai bhi kushti ke dao-pech dekhne lagi yeh sochte hue ki yeh Thakur sahib ki taraf ker paata hai ki nhi. Abhi Kushti ka dao-pech samapt hua hi tha ki meri nazar ittafak se uske peeth per gyi jo khoon se sana tha. Mai ghabra ker Brijesh ki taraf bhaagi. Jab-tak waha per pahuchati tab-tak Brijesh waha se ja chuka tha. Phir chaaro taraf dekhne lagi. Tab vo kisi ghar ke pichhe jate hue dikha. Mai bhi usi taraf chal di. Diwar ke oat hoker dekhti kya hu Brijesh ki peeth per thik usi jagah se Khoon nikal rha tha jis jagah per hatyare ko kidki ki grill se chot lagi thi. Ab mera shak yakin mein badal chuka tha. Mujhe yakin ho gya ki Brijesh hi apne baap ka hatyara hai.Mai us samay kuchh n boli… Sochi bolungi toh yeh mujhe bhi sabut ke taur per dekh ker maar dalega. Jo beta apne baap ko maar sakta hai voh mujhe kya chhodega. Bas mai iss ghadi ka intezar kerne lagi.” – Thakurain kehte-kehte rone lagi.

Brijesh ko chaaro taraf se police gherker ker leti hai. Jab use apne bachao ka koi rasta nhi dikha tab vo apne saare gunah Kabul ker leta hai. Tatt-Pachhyat dhara 302 (Hatya ka dand) ki tahat use taaumra ki saza ho jati hai.

Aaj Amit riha hi nhi hua tha… balki use apne sare sawalon ka jawab bhi mil gya tha.

Yeh kahani aapko kaisi lagi? Apne vichar comment box mein share kare. Agar kahani achhi lagi ho toh ‘Add to Favourites’ button per click ker ke dusro ko bhi yeh kahani padhne ke liye protsahit kare aur apne ‘Your Added Favourites’ (Menu mein hai option) mein jaa ker favourites manage kare.

Add to favorites